ಸಪ್ಟೆಂಬರ್ 24, 2017 ತಾರಿಕೆರ್ ಆಯ್ತಾರಾ ಸಾಂಜೆರ್ 7.00 ವೊರಾರ್ ರುಜಾಯ್ ಫಿರ್ಗಜ್ ಗೊವ್ಳಿಕ್ ಪರಿಷದ್ ಆನಿ ಲ್ಹಾನ್ ಕ್ರಿಸ್ತಾಂವ್ ಸಮುದಾಯ್ ಕೇಂದ್ರಿಕ್ ಸಮಿತಿಚ್ಯಾ ಸಾಂದ್ಯಾಂನಿ ಸಾಂಗಾತಾ ಮೆಳೊನ್ ಮೊಂತಿ ಫೆಸ್ತ್ ಆಚರಣ್ ಆನಿ ನೊವೆಂ ಜೆಂವ್ಚೊ ಸಂಭ್ರಮ್ ರುಜಾಯ್ ಕಲ್ಚರಲ್ ಸಾಲಾಂತ್ ಆಚರ್ಸಿಲೊ. ಸುರ್ವೆರ್ ಭಯ್ಣ್ ಶುಭಾ ಹಿಣೆಂ ಆಮೊರಿ ಆನಿ ಮಾಗ್ಣ್ಯಾ ಸವೆಂ ಹ್ಯಾ ಸಹಮಿಲನಾಕ್ ಸುರ್ವಾತ್ ದಿಲಿ. ರೆಕ್ಟರ್ ಬಾಪ್ ಮಾನಾಧಿಕ್ ಜೆ.ಬಿ.ಕ್ರಾಸ್ತಾನ್ ಮೊಂತಿ ಫೆಸ್ತಾಚ್ಯಾ ಆಚರಣೆಚ್ಯಾ ಮಹತ್ವಾ ವಿಷ್ಯಾಂತ್ ಉಲೊವ್ನ್ ಸರ್ವಾಂಕ್ ಸ್ವಾಗತ್ ಕೆಲೆಂ. ಉಪ್ರಾಂತ್ ಮಾಗ್ಣ್ಯಾ ಸವೆಂ ವಿಗಾರಾನ್ ನೊವೆಂ, ವೊರ್ನಾಂತ್ ಭರ್ಸೊನ್ ಸರ್ವಾಂಕ್ ವಾಂಟ್ಲೆಂ.
ಬಾಪ್ ಅನಿಲ್ ಫೆರ್ನಾಂಡಿಸ್, ಸಿ. ಆ್ಯಂಟನಿ ಮೇರಿ, ಶ್ರೀಮತಿ ಮೊಲಿ ಡಿ’ಸೋಜ ಆನಿ ಶ್ರೀ ಜೊನ್ ಲೋಬೊನ್ ಖೆಳ್ ಚಲವ್ನ್ ಸರ್ವಾಂಕ್ ಸಂತೊಸಾಯ್ಲೆಂ. ಶ್ರೀಮತಿ ಮರ್ಸಿನ್ ಸಿಕ್ವೇರಾನ್ ಲ್ಹಾನ್ ಕ್ರಿಸ್ತಾಂವ್ ಸಮುದಾಯ್ ಹಾಚೆ ವಿಷ್ಯಾಂತ್ ತಿಳ್ಸುನ್, ಆಮ್ಚೆ ಫಿರ್ಗಜೆಂತ್ ಸ್ಥಾಪನ್ ಜಾಲ್ಲಿ, ವಾಡ್‍ಲ್ಲಿ ಆನಿ ಕಾರ್ಯಾವಿಸ್ತಾರ್ ಜಾಲ್ಲೆ ವಿಷ್ಯಾಂತ್ ವಿವರ್ ದೀವ್ನ್, ಸರ್ವಾಂನಿಂ ಸಹಕಾರ್ ದೀಂವ್ಕ್ ಉಲೊ ದಿಲೊ. ಲ್ಹಾನ್ ಕ್ರಿಸ್ತಾಂವ್ ಸಮುದಾಯ್ ಕೇಂದ್ರಿಕ್ ಸಮಿತಿಚ್ಯಾ ಸಾಂದ್ಯಾನಿಂ ಸಾಂಗಾತಾ ಮೆಳೊನ್ ಸಮುದಾಯ್ ಗೀತ್ ಗಾಯ್ಲೆಂ. ಬಾಪ್ ರೊಕ್ಕಿ ಫೆರ್ನಾಂಡಿಸಾನ್ ಜೆವ್ಣಾರ್ ಆಶೀರ್ವಾದ್ ಮಾಗ್ಲೊಂ. ಹೆಂ ಆಚರಣ್ ಕರುಂಕ್ ಸಹಕರ್ಸಿಲ್ಲ್ಯಾ ಸರ್ವಾಂಚೊ ಉಪ್ಕಾರ್ ಬಾವ್ಡುನ್ ಉಪಾಧ್ಯಕ್ಷ್ ಮಾನೆಸ್ತ್ ಸಿ.ಜೆ. ಸೈಮನಾನ್ ಧನ್ಯವಾದ್ ಪಾಠಯೆಂ್ಲ. ವಿನಯ್ ಸೆರಾವೊನ್ ಅಪುರ್ಬಾಯೆನ್ ಕಾರ್ಯೆಂ ನಿರ್ವಹಣ್ ಕೆಲೆಂ. ವಾಡ್ಯಾ ತರ್ಪೆನ್ ಸಾಂದ್ಯಾನಿಂ ಘರಾ ಥಾವ್ನ್ ರಾಂದುನ್ ಹಾಡ್‍ಲ್ಲೆಂ ಶಿತ್, ಸನ್ನಾ, ರಾಂದ್ವಾಯೆಚಿ ನಿಸ್ತಿಂ ಆನಿ ವೊರ್ನ್ ಸಾಂಗಾತಾ ಜೇವ್ನ್ ಮೊಂತಿ ಫೆಸ್ತ್ ಆಚರಣ್ ಸಂಭ್ರಮಾನ್ ಆಚರ್ಸಿಲೆಂ.
