Parish News

ಡಿಸೆಂಬರ್ 24 ತಾರೀಕೆರ್ ರುಜಾಯ್ ಕಥೆದ್ರಲಾಂತ್ ನತಲಾ ಫೆಸ್ತಾಚೊ ಸಂಭ್ರಮ್ ಸಾಂಜೆರ್ ಸಾತ್ ವೊರಾರ್ ಗಾಯನ್ ಮಂಡಳಿಚ್ಯಾ ಸಾಂದ್ಯಾಂನಿ ನತಲಾ ಗೀತಾಂ ಗಾವ್ನ್ ಪ್ರಾರಂಭ್ ಕೆಲೊ. ಬಾಪ್ ವಿನೋದ್ ಲೋಬೊನ್ ತಾಂಕಾ ಸಾಂಗತ್ ದಿಲೊ. ಸಾಂಜೆರ್ 7.30 ವೊರಾರ್ ಸಂಭ್ರಮಿಕ್ ಮಿಸಾಚೆ ಬಲಿದಾನ್ ಪ್ರಾರಂಭ್ ಜಾಲೆ. ಮಂಗ್ಳೂರ್ ದಿಯೆಸೆಜಿಚೆ ಗೊವ್ಳಿ ಬಾಪ್ ಭೋವ್ ಮಾನಾಧಿಕ್ ದೊತೊರ್ ಬಾಪ್ ಪೀಟರ್ ಪಾವ್ಳು ಸಲ್ಡಾನ್ಹಾ ಪ್ರಧಾನ್ ಮ್ಹನಿಯಾರಿ ಜಾವ್ನಸ್ಲೆ. ಕಥೆದ್ರಲಾಚೆ ರೆಕ್ಟರ್ ಮಾನಾಧಿಕ್ ಬಾಪ್ ಅಲ್ಫ್ರೇಡ್ ಜೆ ಪಿಂಟೋ, ಸಹಾಯಕ್ ವಿಗಾರ್ ಬಾಪ್ ವಿನೋದ್ ಲೋಬೊ, ವಸ್ತೆ ಯಾಜಾಕ್ ಬಾಪ್ ವಲೇರಿಯನ್ ಫ್ರಾಂಕ್ ನ್ ಗೊವ್ಳಿ ಬಾಪಾಂಕ್ ಸಹ ಭೆಟವ್ನೆಂತ್ ಸಾಂಗಾತ್ ದಿಲೊ. ಗೊವ್ಳಿ ಬಾಪಾಂನಿ, ದೇವ್ ಕೆದಾಳಾಚ್ ರಾಗಾರ್ ಜಾಯ್ನಾ ವ ದ್ವೇಷಚಿಂ ಉತ್ರಾಂ ಉಲಯ್ನಾ ಬಗಾರ್ ಮೊಗಾಚೊ ಆನಿ ಶಾಂತಿ ಸಮಧಾನೆಚೊ ಸಂದೇಶ್ ತಾಣೆಂ ಅಪ್ಲ್ಯಾ ಎಕಾಚ್ ಪುತಾಕ್ ಸಂಸಾರಾಕ್ ಧಾಡ್ನ್ ಅಪ್ಲ್ಯಾ ಪುತಾ ಮುಖಾಂತ್ರ್ ಸಂಸಾರಾಕ್ ಹೊ ಸಂದೇಶ್ ಪಾಚಾರ್ಲಾಂ. ತೊಚ್ ಮೋಗ್ ಆನಿ ಶಾಂತಿ ಸಮಾಧಾನ್ ಅಮಾಂ ಸರ್ವಾಂ ಮಧೆಂ ಸದಾಂಚ್ ಅಸೊಂಕ್ ಜಾಯ್ ಆನಿ ತೊ ಮೋಗ್ ಆನಿ ಶಾಂತ್ ಸಮಾಧಾನ್ ಹೆರಾಂ ಭಾವಾಂ ಭಯ್ಣಿಂ ಮಧೆಂ ಆಮಿಂ ವಾಂಟುನ್ ಘೆಂವ್ಕ್ ಜಾಯ್ ಮ್ಹಳ್ಳೊ ಸಂದೇಶ್ ದಿಲೊ. ಗೊವ್ಳಿಕ್ ಪರಿಷದೆಚ್ಯಾ ಉಪಾಧ್ಯಕ್ಷ್, ಕಾರ್ಯದರ್ಶಿ, ಆಯೋಗಾಚೊ ಸಂಚಾಲಕ್ ಆನಿ ಸಾಂದೆಚ್ಯಾ ಮುಕೇಲ್ಪಣಾಖಾಲ್ ಫಿರ್ಗಜ್ ಕುಟ್ಮಾನ್, ಪ್ರಸ್ತಾವನ್, ದೆವಾಚೆ ಉತಾರ್ ಆನಿ ಭಾವಾರ್ಥಾಚಿ ಪ್ರಾರ್ಥನಾಂ ವಾಚ್ಲಿಂ. ಮಿಸಾ ಉಪ್ರಾಂತ್ ರುಜಾಯ್ ಯುವಜಣಾಂಚ್ಯಾ ಮುಖೇಲ್ಪಾನಾಖಾಲ್ ಗೊವ್ಳಿ ಬಾಪ್ ಆನಿ ಫಿರ್ಗಜ್ ಯಾಜಾಕಾಂ ಸವೆಂ ಉಗ್ತ್ಯಾ ಮೈದಾನಾರ್ ಕ್ರಿಸ್ಮಸ್ ಕೇಕ್ ಕಾತರ್ನ್ ನತಲಾಂ ಫೇಸ್ತಾಸೊ ಸಂಭ್ರಮ್ ವಾಂಟುನ್ ಘೆತ್ಲೊ. ಭರ್ಪೂರ್ ಮನೋರಂಜನ್ ಖೇಳ್, ಕುಸ್ವಾರ್ ಏಲಂ, ಹೌಸಿ ಹೌಸಿ ಆನಿ ಸಂತಕ್ಲೋಸಾಚೊ ನಾಚಾ ಸವೆಂ ಫಿರ್ಗಜ್ ಕುಟ್ಮಾನ್ ಏಕಾಮೆಕಾ ಫೆಸ್ತಾಚೆ ಉಲ್ಲಾಸ್ ಪಾಠವ್ನ್ ಜೇಜು ಕ್ರಿಸ್ತಾಚೆ ಜನನಾಸೊ ಸಂಭ್ರಮ್ ಆಚರಣ್ ಕೆಲೊ.