Parish News

ಬ್ರೆಸ್ತಾರಾ, ಆಕ್ಟೋಬರಾಚ್ಯಾ 17 ತಾರಿಕೆರ್, ರುಜಾಯ್ ಫಿರ್ಗಜೆಚ್ಯಾ ಸ್ತ್ರೀಯಾಂಚೊ ಆಯೋಗ್, ಲೇಡಿಸ್ ಸೋಶಿಯಲ್ ಸರ್ವಿಸ್ ಲೀಗ್ ಆನಿ ಲೀಜನ್ ಆಫ್ ಮೇರಿ ಹಾಣಿಂ ಸಾಂಗಾತಾ ಮೆಳುನ್ ರುಜಾಯ್ ಫಿರ್ಗಜೆಚ್ಯಾ ಸ್ತ್ರೀಯಾಂ ಖಾತಿರ್ ಎಕಾ ದಿಸಾಚೆಂ “ಲೇಡೀಸ್ ಡೇ ಔಟ್” ಕಾರ್ಯಕ್ರಮ್ ಅಸಾ ಕೆಲೆಂ. ಹ್ಯಾ ಕಾರ್ಯಕ್ರಮಾಕ್, ತ್ಯಾ ದೀಸ್ ಸಕಾಳಿಂ 8.20 ಕ್ ಒಟ್ಟು 42 ಸ್ತ್ರೀಯೊ ಆನಿ ಸಹಾಯಕ್ ವಿಗಾರ್ ಮಾನಾಧಿಕ್ ಬಾಪ್ ವಿನೋದ್ ಲೋಬೊ ಅಶೆಂ 43 ಜಣ್ ಇಗರ್ಜೆಚ್ಯಾ ಅಂಗ್ಣಾತ್ ಸಾಂಗಾತಾ ಮೆಳ್ಳಿ. ಟೂರಿಸ್ಟ್ ಬಸ್ಸಾರ್ ಆಮ್ಚೆಂ ಪಯ್ಣ್ ಆಮಿಂ ಮಾಗ್ಣೆಂ ಆನಿ ತೇರ್ಸಾಂ ಮುಖಾಂತ್ರ್ ಗುರುಪುರುಚ್ಯಾ, ಕಿನ್ನಿಕಂಬ್ಳ ರೋಜಾ ಮಿಸ್ತಿಕಾ ಅಜಾಪಾಂಚ್ಯಾ ಮಾಯೆಚೊ ಗ್ರೋಟ್ಟೊ ಭೆಟ್ ಕರ್ಚೆಂ ಮುಖಾಂತ್ರ್ ಪ್ರಾರಂಭ್ ಕೆಲೆಂ. ಥೈಂಸರ್ ಸುರ್ವೆರ್ ದೈವಿಕ್ ಕಾಕುಳ್ತಿಚೊ ತೇರ್ಸ್ ಭೆಟಯ್ಲೊಂ. ಉಪ್ರಾಂತ್ ಬೆಥೆನಿ ಕಾನ್ವೆಂಟಾಚಿ ಸಿಸ್ಟರ್ ಮರಿ ಮಾಯೆಚ್ಯಾ ದರ್ಶನಾ ಮುಖಾಂತ್ರ್ ಆಶೀರ್ವಾದಿತ್ ಜಾಲ್ಲಿ ಸಿಸ್ಟರ್ ಜುಲೇಟಾನ್ ತ್ತ್ಯಾ ಜಾಗ್ಯಾಚಿ ವಿಶೇಷತಾ, ಮರಿ ಮಾಂಯ್ ಕಶೆಂ ಥೈಂಸರ್ ಕಾಮ್ ಕರ್ಚ್ಯಾ ಸ್ತ್ರೀಯಾಂಕ್ ಭೆಟ್ಲಿಂ ಆನಿ ಮರಿ ಮಾಯೆನ್ ಕಿತೆಂ ಸಂದೇಶ್ ದಿಲೊ ಮ್ಹಳ್ಳೆಂ ವಿಶಿಂ ಆಮ್ಕಾಂ ವಿವರ್ಸಿಲೆಂ. ತಶೆಂಚ್ ಪಾಟ್ಲ್ಯಾ ತೀನ್ ವರ್ಸಾಂ ಥಾವ್ನ್ ಮರಿಯೆನ್ ದಿಲ್ಲೊ ಸಂದೇಶ್ ಕಿತೆಂ ಆನಿ ಮರಿ ಮಾಯೆಚ್ಯಾ ಸಂದೇಶ ವರ್ವಿಂ ಕಿತೆಂ ಸಕ್ಕಡ್ ಬರೆಂ ಪಣ್ ಜಾಲಾ ಮ್ಹಳ್ಳ್ಯಾ ವಿಶಿಂ ಭರ್ಪೂರ್ ವಿವರಣ್ ಆಮ್ಕಾಂ ದೀವ್ನ್ ಹೆಂ ಸರ್ವ್ ಆಯ್ಕಾಲ್ಲ್ಯಾ ಆಮ್ಕಾಂ ಆನಿ ಥೈಂಸರ್ ತ್ಯಾ ಪವಿತ್ರ್ ಜಾಗ್ಯಾಕ್ ಭೆಟ್ ದೀಂವ್ಕ್ ಫಾವೊ ಜಾಲ್ಲ್ಯಾ ಆಮ್ಕಾಂ ಸರ್ವಾಂಕ್ ವರ್ತೊ ಸಂತೋಸ್ ಜಾಲೊ ಆನಿ ಹೊ ಆವ್ಕಾಸ್ ಫಾವೊ ಕೆಲ್ಲ್ಯಾ ಧನ್ಯಾ ದೆವಾಕ್ ಆಮಿಂ ಅರ್ಗಾಂ ಪಾಠಯ್ಲೆಂ. ಅಶೆಂ ಥೈಂಸರ್ ಆಮಿಂ ಮಾಗ್ಣೆಂ ಆನಿ ಆಶೀರ್ವಾದ್ ಘೆವ್ನ್ ಸುಮಾರ್ 10.30ವೊರಾಂ ಮ್ಹಣಾಸರ್ ಭಕ್ತಿಪಣಿ ಆಮ್ಚೊ ವೇಳ್ ಖರ್ಚಿಲೊ. ಉಪ್ರಾಂತ್ ಆಮ್ಚೆಂ ಪಯ್ಣ್ ಆಮಿಂ ಬಸ್ಸಾರ್ ತನ್ನೀರ್ ಬಾವಿಚ್ಯಾ ಇಗರ್ಜೆಕ್ ಮುಂದರ್ಸಿಲೆಂ. ಥೈಂಸರ್ ಕಾಫಿ ಫಳ್ಹಾರ್ ಸೇವ್ನ್ ದೊನ್ಪಾರಾಚ್ಯಾ 12.30 ಮ್ಹಣಾಸರ್ ಭರ್ಪೂರ್ ಮನೋರಂಜನ್ ಪಂಗಡ್ ಖೆಳ್ ಮಾನೆಸ್ತಿಣ್ ಐಡಾ ಪುರ್ಟಾಡೊ, ಮಾನೆಸ್ತಿಣ್ ಮೇಬಲ್ ಡಿಸೋಜ ಆನಿ ಸಿಸ್ಟರ್ ರೋಜ್ ಮಿಟಾನ್ ಚಲವ್ನ್ ವರುನ್ ಸರ್ವಾಂಕ್ ಧಾದೊಶಿಂ ಕೆಲೆಂ. ದೊನ್ಪಾರಾಚ್ಯಾ 12.45 ಕ್ ತನ್ನೀರ್ ಬಾವಿ ಫಾತಿಮಾ ಮಾಯೆಚ್ಯಾ ಇಗರ್ಜೆಂತ್ ಮಾನಾಧಿಕ್ ಬಾಪ್ ವಿನೋದ್ ಲೋಬೊನ್ ಪವಿತ್ರ್ ಮಿಸಾಚೆಂ ಬಲಿದಾನ್ ಆಮ್ಚೆಂ ಖಾತಿರ್ ಭೆಟಯ್ಲೆಂ ಆನಿ ಆಮ್ಕಾಂ ಸರ್ವಾಂಕ್ ಬರೊ ಸಂದೇಶ್ ದೀವ್ನ್ ಆಶೀರ್ವಾದಿತ್ ಕೆಲೆಂ.ಮಿಸಾಂ ಉಪ್ರಾಂತ್ ರುಚಿಕ್ ಜೆವಾಣ್ ಜೇವ್ನ್ 2.30 ವೊರಾಂ ಉಪ್ರಾಂತ್ ಮನೋರಂಜಿತ್ ಹೌಸಿ ಹೌಸಿ ಖೆಳ್ ಮಾನೆಸ್ತಿಣ್ ರೀಟಾ ಡಿಸೋಜಾನ್ ಆನಿ ಸಹಾಯಕ್ ವಿಗಾರ್ ಬಾಪಾಂನಿ ಚಲವ್ನ್ ವೆಲೆಂ. ಸಾಂಜೆರ್ 4 ವೊರಾರ್ ಸಾಂಜೆಚಿ ಕಾಫಿ ಫಳ್ಹಾರ್ ಸೇವ್ನ್ ತನ್ನೀರ್ ಬಾವಿಚ್ಯಾ ದರ್ಯಾ ದೆಗೆರ್ ಆನಿ ಉದ್ಕಾಂತ್ ಆಮ್ಚೊ ಥೊಡೊ ವೇಳ್ ಪಾಚಾರ್ ಕರುನ್ ಆಮಿಂ ಸಂತೋಸ್ ಭರಿತ್ ಜಾಲ್ಯಾಂವ್.

ಉಪ್ರಾಂತ್ ಸಾಂಜೆರ್ 5 ವೊರಾರ್ ತನ್ನೀರ್ ಬಾವಿ ಥಾವ್ನ್ ರುಜಾಯ್ ಇಗರ್ಜೆಚೆಕ್ ಪಾಟಿ ಯೇಂವ್ಕ್ ಆಮ್ಚೆಂ ಪಯಣ್ ಆಮಿಂ ಪ್ರಾರಂಭ್ ಕೆಲೆಂ. ಹ್ಯಾ ವೆಳಾರ್ ಸಹಾಯಕ್ ವಿಗಾರ್ ಬಾಪಾಂನಿ ತಶೆಂಚ್ ಸಿಸ್ಟರ್ ರೋಜ್ ಮಿಟಾನ್ ಹೆಂ ಕಾರ್ಯೆಂ ಯಶಸ್ವಿ ಜಾಂವ್ಕ್ ಆಧಾರ್ಸಿಲ್ಲ್ಯಾ ಸುಧಾರ್ಸಿಲ್ಯಾ ಸರ್ವಾಂಚೊ ಉಪ್ಕಾರ್ ಬಾವುಡ್ಲೊಂ. ಪ್ರತ್ಯೇಕ್ ಜಾವ್ನ್ ಉಪ್ಕಾರ್ ಬಾವುಡ್ಲೊ ಹೆಂ ಕಾರ್ಯೆಂ ಅಸಾ ಕೆಲ್ಲ್ಯಾ ಸ್ತ್ರೀಯಾಂಚೊ ಆಯೋಗ್, ಲೇಡಿಸ್ ಸೋಶಿಯಲ್ ಸರ್ವೀಸ್ ಲೀಗ್ ಆನಿ ಲೀಜನ್ ಆಫ್ ಮೇರಿ ಸಂಘಟನಾಚೊ ಉಪ್ಕಾರ್ ಬಾವುಡ್ಲೊ.ಹ್ಯಾ ಕಾರ್ಯಾಕ್ ಸಹಾಯಕ್ ವಿಗಾರ್ ಬಾಪ್ ವಿನೋದ್ ಲೊಬೊ, ಮಾನೆಸ್ತಿಣ್ ರೀಟಾ ಡಿಸೋಜ, ಮಾನೆಸ್ತಿಣ್ ಐಡಾ ಫುರ್ಟಾಡೊ ಆನಿ ಸಿಸ್ಟರ್ ರೋಸ್ ಮಿಟಾನ್ ಭರ್ಪೂರ್ ಸಹಾಕಾರ್ ದಿಲಾಂ.