ಸಾಂತ್ ಅಂತೊನ್ ವಾಡ್ಯಾಚೆಂ ಫೆಸ್ತ್

2023 ಜೂನ್ ಮಹಿನ್ಯಾಚಾ 18 ತಾರಿಕೆರ್ ಸಾಂತ್ ಅಂತೊನ್ ವಾಡ್ಯಾಗಾರಾನಿ ಸಕಾಳಿಂ 8 ವೊರಾಂಚಾ ಮಿಸಾಚಿ ದೇವ್ ಸ್ತುತಿ ಚಲೊವ್ನ್ ವ್ಹೆಲಿ. ಸಹಾಯಕ್ ಬಾಪ್ ವಿನೋದ್ ಲೋಬೊನ್ ಮಿಸಾಚೆಂ ಬಲಿದಾನ್ ಭೆಟೈಲೆಂ. ಸಾಂಜೆರ್ 4 ವೊರಾಂ ಥಾವ್ನ್ 6 ವೊರಾಂ ಪರ್ಯಾಂತ್ ವಾಡ್ಯಾಚಾ ಫೆಸ್ತ್ತಾಚೆಂ ಸಹಮಿಲನ್ ಮಾನೆಸ್ತಿಣ್ ಪ್ರಾನ್ಸಿಸ್ ಆ್ಯನೆಟ್, ಪಿಂಟೊ ಮಹಲ್ ಬೋಳಾರ್ ಹಾಂಗಾಸರ್ ಆಸಾ ಕೆಲ್ಲೆಂ . ಹ್ಯಾ ಕಾರ್ಯಾಕ್ ಮಾನಾದಿಕ್ ಬಾಪ್ ಆಲ್ಫೆಡ್ ಜೆ. ಪಿಂಟೊ ಆನಿ ದಿಯಾಕೊನ್ ಬ್ರದರ್ ಹಾಜರ್ ಆಸ್‍ಲ್ಲೆ. ಫಿರ್ಗಜೆಚ್ಯಾ ಗೊವ್ಳಿಕ್ ಪರಿಷದೆಚೆ ಉಪಾಧ್ಯಕ್ಷ್ ಮಾನೆಸ್ತ್ ಜೋನ್ ಡಿಸಿಲ್ವಾ ಆನಿ ಕಾರ್ಯದರ್ಶಿ ಮಾನೆಸ್ತಿಣ್ ಹೆಜೆಲ್ ಮಿನೇಜಸ್ ಹಾಜರ್ ಆಸ್‍ಲ್ಲಿ. ಸುರ್ವೆರ್ ಸರ್ವಾಂನಿ ಸಾಂಗಾತಾ ಮೆಳೊನ್ ಎಕ್ ಕುಟಾಮ್ ಜಾವ್ನ್ ಮ್ಹಳ್ಳೆಂ ಗೀತ್ ಗಾಯ್ಲೆಂ ಆನಿ ದೆವಾಚೆಂ ಉತಾರ್ ವಾಚುನ್ ತಾಚೊ ನಿಯಾಳ್ ಕೆಲೊ. ವಾಡ್ಯಾಚಿ ಗುರ್ಕಾರ್ ಮಾನೆಸ್ತಿಣ್ ರೀಟಾ ಡಿಸೋಜನ್ ಸರ್ವ್ ಮಾನಾಚಾ ಸೈರ್ಯಾಂಕ್ ಫುಲಾಂ ದೀವ್ನ್ ಸ್ವಾಗತ್ ಕೆಲೊ . ವಿಗಾರ್ ಬಾಪ್ ಮಾ. ಬಾ. ಆಲ್ಫ್ರೆಡ್ ಪಿಂಟೊನ್ ಮಟ್ವ್ಯಾನ್ ಫೆಸ್ತಾಚೊ ಸಂದೇಶ್ ದಿಲೊ ಆನಿ ಸರ್ವ್ ವಾಡ್ಯಾಗಾರಾಂಕ್ ಬರೆಂ ಮಾಗ್ಲೆಂ . ಅದ್ಲ್ಯಾ ವರ್ಸಾ 10ವ್ಯಾ ಆನಿ ಪಿಯುಸಿ ಕ್ಲಾಸಿಂತ್ ಉತ್ತೀರ್ಣ್ ಜಾಲ್ಲ್ಯಾ ವಿದ್ಯಾರ್ಥಿಂಕ್ ಉಡಾಸಾಚಿ ಕಾಣಿಕ್ ವಿಗಾರ್ ಬಾಪಾಂನಿ ವಾಂಟ್ಲಿ. ಮಾನೆಸ್ತ್ ಅಂಟೊನಿ ಡಿಸಿಲ್ವನ್‍ಸಾಂತ್ ಅಂತೊನಿಚಾ ಜಿಣ್ಯೆ ವಯ್ರ್ ಕ್ವಿಜ್ ಚಲೊವ್ನ್ ವೆಲೆಂ . ಮಾನೆಸ್ತಿಣ್ ಡೋರಿನ್ ಡಿಸೋಜನ್ 2022-23 ವರ್ಸಾಚಿ ವರ್ದಿ ವಾಚ್ಲಿ. ಆರ್ಸುಲಾಚಿ ಧರ್ಮ್ ಭಯ್ಣ್ ಸೆಲಿನ್ ಡೆಸ್ಸಾನ್ ವಿವಿಧ್ ಖೆಳ್ ಚಲೊವ್ನ್ ವೆಲೆ ಆನಿ ಖೆಳಾಂತ್ ಜಿಕ್ಲೆಲ್ಯಾಂಕ್ ಇನಾಮಾಂ ವಾಂಟ್ಲಿಂ. ತ್ಯಾ ದಿಸಾ ಅಂತರಾಷ್ಟ್ರೀಯ್ ಬಾಪಾಯಾಂಚೊ ದೀಸ್ ಜಾಲ್ಲೆ ವರ್ವಿಂ ವಾಡ್ಯಾಂತ್ಲ್ಯಾ ಸರ್ವ್ ಬಾಪಾಯಾಂಕ್ ಉಲ್ಲಾಸಿಲೆಂ. ಮಾನೆಸ್ತಿಣ್ ಸುನಿತಾ ರೊಡ್ರಿಗಸ್ ಹಿಣೆಂ ಸಗ್ಳೆ ಕಾರ್ಯೆಂ ಚಲೊವ್ನ್ ವೆಲೆಂ. ಮಾನೆಸ್ತಿಣ್ ರೀಟಾ ಡಿಸೋಜನ್ ಸರ್ವಾಂಚೊ ಉಪ್ಕಾರ್ ಭಾವುಡ್ಲೊ. ನಿಮಾಣೆಂ ಸರ್ವಾಂನಿ ಸಾಂತ್ ಅಂತೊನಿಚ್ಯಾ ಮಾನಾಕ್ ಗೀತ್ ಗಾಯ್ಲೆಂ ಆನಿ ಕಾಫಿ ಫಳಾರ್ ಸ್ವಿಕಾರ್ ಕೆಲೊ.