Parish News

ಸೆಪ್ಟಂಬರ್ 8 ತಾರಿಕೆರ್ ರುಜಾಯ್ ಕಾಥೆದ್ರಾಲಾಂತ್ ಮೊಂತಿ ಫೆಸ್ತಾಚೆಂ ಆಚರಣ್ ಚಲ್ಲೆಂ. ಸಕಾಳಿಂ 8 ವೊರಾರ್ ಸರ್ವ್ ಯಾಜಕ್, ಧರ್ಮ್ ಭಯ್ಣಿಂ ಆನಿ ಫಿರ್ಗಜ್ ಗಾರಾಂ ಗ್ಲ್ಯಾಡ್‍ಸಮ್ ಘರಾ ಲಾಗಿಂ ಸಾಂಗಾತಾ ಮೆಳ್ಳಿಂ. ಕಾಥೆದ್ರಾಲಾಚೊ ರೆಕ್ಟರ್ ಮಾ|ಬಾ| ಜೆ.ಬಿ. ಕ್ರಾಸ್ತಾ ಹಾಣಿಂ ನವೆಂ ಭಾತ್ ಬೆಂಜಾರ್ ಕೆಲೆಂ. ಉಪ್ರಾಂತ್ ಪುರ್ಶಾಂವಾರ್ ಸರ್ವ್ ಲೋಕ್ ಇಗರ್ಜೆ ಕುಶಿಂ ಚಮ್ಕಾಲೊ. ಸುರ್ವೆರ್ ಖುರಿಸ್, ಬ್ಯಾಂಡ್, ಭುರ್ಗಿಂ ವ್ಹಡಾಂ ಯಾಜಕ್ ಅನಿ ನಿಮಾಣೆಂ ಮೊಂತಿ ಮಾಯೆಚಿ ಇಮಾಜ್ ಘೆತ್ ಲ್ಲೆಂ ಟ್ರಕ್ಕ್ ಚಲ್ಲೆಂ. ಆಶೆಂ ವ್ಹಡಾ ವಯ್ಬಾವಾನ್ ಮರಿಯೆ ಮಾಯೆಚಿ ಹೊಗ್ಳಿಕ್ ಗಾಯ್ತ್ ಲೋಕ್ ಕಾಥೆದ್ರಾಲಾಕ್ ಯೇವ್ನ್ ಪಾವ್ಲೊ. ಉಪ್ರಾಂತ್ ಕಾಥೆದ್ರಾಲಾಚ್ಯಾ ಗ್ರೊಟ್ಟ್ಯಾ ಲಾಗಿಂ ಸರ್ವಾಂನಿ ಸಾಂಗಾತಾ ಮೆಳುನ್ ಮರಿಯೆಕ್ ಫುಲಾಂ ಅರ್ಪಿಲಿಂ.

ಉಪ್ರಾಂತ್ ಮಿಸಾಚೆಂ ಬಲಿದಾನ್ ಚಲ್ಲೆಂ. ಪ್ರಧಾನ್ ಯಾಜಕ್ ಜಾವ್ನ್ ಅ|ಮಾ|ದೊ| ಲುವಿಸ್ ಪಾವ್ಲು ಸೊಜ್ – ಮಂಗ್ಳುರ್ಚೊ ಗೊವ್ಳಿಬಾಪ್ ಹಾಣಿಂ ಮಿಸಾಚೆಂ ಬಲಿದಾನ್ ಭೆಟಯ್ಲೆಂ. ಕಾಥೆದ್ರಾಲಾಚೊ ರೆಕ್ಟರ್ ಮಾ|ಬಾ| ಜೆ.ಬಿ ಕ್ರಾಸ್ತಾ, ಸಹಾಯಕ್ ಮಾ|ಬಾ| ಫ್ಲೇವಿಯನ್ ಲೋಬೊ, ಪ್ರಾಂಶುಪಾಲ್ ಮಾ|ಬಾ| ರೊಕ್ಕಿ ಫೆರ್ನಾಂಡಿಸ್, ಮಾ|ಬಾ| ವಿಕ್ಟರ್ ಡಿಸೋಜ, ಮಾ|ಬಾ| ಅನಿಲ್ ಐವನ್ – ಗ್ಲ್ಯಾಡ್ಸಮ್ ಸೆಮಿನರಿಚೊ ರೆಕ್ಟರ್ ಹಾಣಿಂ ಸಹ ಭೆಟವ್ಣಿ ಕೆಲಿ.

ಮಿಸಾ ನಂತರ್ ಗೊವ್ಳಿ ಬಾಪಾಂಕ್ ಮಟ್ವೆಂ ಆದೆವ್ಸ್ ಕಾರ್ಯೆಂ ಆಸಾ ಕೆಲ್ಲೆಂ. ತಾಣಿಂ ಕಾಥೆದ್ರಾಲಾಚೊ ಅಧಿಕೃತ್ ವಿಗಾರ್ ಜಾವ್ನ್ ದಿಲ್ಲ್ಯಾ ಸೆವೆ ಖಾತಿರ್ ತಾಂಕಾಂ ಮಾನ್ ಕೆಲೊ ಅನಿ ಉಪ್ಕಾರ್ ಬಾವುಡ್ಲೊ. ಗೊವ್ಳಿಬಾಪ್ ಉಲೊವ್ನ್ ಕಾಥೆದ್ರಾಲಾಂತ್ ಚಲ್ಚ್ಯಾ ಅಭಿವೃದ್ದೆ ವಿಶಿಂ, ಮೊಂತಿ ಫೆಸ್ತಾಚ್ಯಾ ಸಂಭ್ರಮಾ ವಿಶಿಂ ಹೊಗ್ಳೀಕ್ ಉಚಾರ್ಲಿ. ಉಪ್ರಾಂತ್ ಸರ್ವ್ ಗುರ್ಕಾರಾಂಕ್ ಗೊವ್ಳಿ ಬಾಪಾಂನಿ ಕಣ್ಶ್ಯೊ ವಾಂಟ್ಲ್ಯೊ. ನಿಮಾಣ್ಯಾ ಗಿತಾ ಸವೆಂ ತ್ಯಾ ದಿಸಾಚೊ ಸಂಭ್ರಮ್ ಸಂಪೆÇ್ಲ.