ಸಾಂ ಇನಾಸ್ ವಾಡ್ಯಾಚೆ ಫೆಸ್ತ್

ಸಾಂ ಇನಾಸ್ ವಾಡ್ಯಾಚೆ ಫೆಸ್ತ್ 28.07.2024ಕ್ ಸಕಾಳಿಂಚಾ ಮಿಸಾ ಸವೆಂ 8.00 ವೊರಾರ್ ಪ್ರಾರಂಭ್ ಜಾಲೆಂ. ಪ್ರಧಾನ್ ಯಾಜಕ್ ಜಾವ್ನ್ ಕುಟ್ಮಾ ಜಿವಿತ್ ಕೇಂದ್ರಾಚೆ ದಿರೆಕ್ತೊರ್ ಮಾನಾಧಿಕ್ ಬಾಪ್ ಆಲ್ವಿನ್ ರಿಚರ್ಡ್ ಡಿಸೋಜಾನ್ ಮೀಸ್ ಭೆಟೈಲೆಂ. ತಶೆಂಚ್ ಬಾಪ್ ಆಲ್ಫ್ರೆಡ್ ಪಿಂಟೊ, ಸಹಾಯಕ್ ಬಾಪ್ ವಿನೋದ್ ಲೋಬೊ ಹಾಣಿ ಸಹ ಭೆಟವ್ಣಿ ಕೆಲಿ. ಕಾಜಾರ್ ಜಾಲ್ಲ್ಯಾಂಚೊ ದೀಸ್ ಸಂಭ್ರಮ್ಲೊ. ಆಪ್ಲ್ಯಾ ಶೆರ್ಮಾವಾಂತ್ ಬಾಪ್ ಆಲ್ವಿನಾನ್ ಕಶೆಂ ಆಮಿ ಆಮ್ಚೆಂ ಕಾಜಾರಿ ಜಿವಿತ್ ಚಲವ್ನ್ ವರುಂಕ್ ಜಾಯ್ ಮ್ಹಣ್ ತಿಳ್ಸಿಲೆಂ. ಉಪ್ರಾಂತ್ ಫೆಸ್ತಾಚೆಂ ಸಹಮಿಲನ್ ಸಾಂಜೆರ್ 6.00 ವೊರಾರ್ ಮಾನೆಸ್ತ್ ವಿನ್ಸೆಂಟಾಚಾ ಘರಾ ಚಲವ್ನ್ ವ್ಹೆಲೆಂ. ಥಂಯ್ಸರ್ ಸರ್ವ್ ವಾಡ್ಯಾಗಾರ್ ಸಾಂಗಾತಾ ಮೆಳೊನ್ ಫೆಸ್ತ್ ಸಂಭ್ರಮ್ಲೆಂ. ವಿಗಾರ್ ಬಾಪ್ ಆಲ್ಫ್ರೆಡ್ ಪಿಂಟೊ, ಬಾಪ್ ವಿನೋದ್ ಲೋಬೊ, ಬಾಪ್ ವಲೇರಿಯನ್ ಆನಿ ಚಿಕ್‍ಮಗಳೂರ್ ದಿಯೆಸೆಜಿಚಾ ಮಲ್ಲಂದೂರ್ ಫಿರ್ಗಜೆಚೆ ಯಾಜಕ್ ಬಾಪ್ ಫ್ರೆಡ್ರ್ರಿಕ್ ಪಾಯ್ಸ್ ಹಾಜರ್ ಆಸ್‍ಲ್ಲೆ. ಮಾಗ್ಣ್ಯಾದ್ವಾರಿಂ ಆಮ್ಚೆಂ ಕಾರ್ಯೆಂ ಆರಂಭ್ ಕೆಲೆಂ. ಜಮ್ಲೆಲ್ಯಾ ಸರ್ವಾಂಕ್ ಮಾನೆಸ್ತಿಣ್ ವೀಣಾನ್ ಸ್ವಾಗತ್ ಕೆಲೆಂ. ವಾಡ್ಯಾಂತ್ಲ್ಯಾ ಭುರ್ಗ್ಯಾಂನಿ ಆಪ್ಲ್ಯಾ ನಾಚಾದ್ವಾರಿಂ ಸರ್ವಾಂಕ್ ಮನೋರಂಜನ್ ಕೆಲೆಂ. ಮಾನೆಸ್ತಿಣ್ ಐಡಾನ್ ಮನೋರಂಜನ್ ಕರ್ಚಾ ಖಾತಿರ್ ಖೆಳ್ ಚಲವ್ನ್ ವೆಲೆ. ವಾಡ್ಯಾಂತ್ ಆಸ್ಚಾ ಮಾಲ್ಘಡ್ಯಾಂಕ್ ಮಾನ್ ಕೆಲೊ. ತಶೆಂಚ್ ಭುರ್ಗ್ಯಾಂಕ್ ಸನ್ಮಾನ್ ಕರ್ನ್ ಮೊಗಾಚಿ ಕಾಣಿಕ್ ಅರ್ಪಿಲಿ. 2023-24 ಇಸ್ವೆಂತ್ CBSE ಬೋರ್ಡಾನ್ ಚಲವ್ನ್ ವೆಲ್ಲ್ಯಾ ಧಾವ್ಯೆ ಕ್ಲಾಸಿಚಾ ಪರೀಕ್ಷೆಂತ್ ಉತ್ತಮ್ ಅಂಕ್ ಕಾಡ್ಲೆಲ್ಯಾ ಸ್ಟ್ಯಾಲನ್ ಆನಿ ಖೆಳಾ ಕ್ಷೇತ್ರಾಂತ್ ಕರ್ನಾಟಕ State ಥಾವ್ನ್ ಮಹಾರಾಷ್ಟ್ರಾಂತ್ ಆಸಾ ಕೆಲ್ಲ್ಯಾ ‘ಲಗೋರಿ’ ಖೆಳಾಂತ್ ಭಾಗ್ ಘೆವ್ನ್,Mixed Lagori  Match ಂತ್ ವಿಶಾಲ್ ಡಿಸೋಜಾನ್ ದುಸ್ರೆಂ ಸ್ಥಾನ್ ಆಪ್ಣಾಯ್ಲಾಂ. (State Level) ಹ್ಯಾ ದೊಗಾಂಯ್ಕಿ ವಾಡ್ಯಾ ಥಾವ್ನ್ ಸನ್ಮಾನ್ ಕಾರ್ಯೆಂ ಆಸಾ ಕೆಲ್ಲೆಂ. ತಶೆಂಚ್ ಕಥೊಲಿಕ್ ಸಭಾ ಎಪಿಸ್ಕೋಪಲ್ ಸಿಟಿ ವಾರಾಡೊ ಹಾಚೆ ಅಧ್ಯಕ್ಷ್ ಜಾವ್ನ್ ಚುನಾಯಿತ್ ಜಾಲ್ಲ್ಯಾ ಐಡಾಕ್ ವಾಡ್ಯಾ ಥಾವ್ನ್ ಮಾನ್ ಕೆಲೊ. ಪಾಟ್ಲ್ಯಾ ಚಾರ್ ವರ್ಸಾಂ ಥಾವ್ನ್ ರುಜಾಯ್ ಫಿರ್ಗಜೆಂತ್ ಬಾಪ್ ಆಲ್ಫ್ರೆಡಾನ್ ಕೆಲ್ಲ್ಯಾ ಸರ್ವ್ ಬರ್ಯಾ ಕಾಮಾಂಕ್ ಸಾಂ ಇನಾಸ್ ವಾಡ್ಯಾಗಾರಾಂನಿ ಮಾನ್ ಕೆಲೊ. 8.45 ಕ್ ಜೆವ್ಣಾ ಸವೆಂ ಕಾರ್ಯೆಂ ಅಖೇರ್ ಕೆಲೆಂ. ಜಮ್ಲೆಲ್ಯಾ ಸರ್ವಾಂಕ್ ಗುರ್ಕಾರ್ನ್ ಮೇಬಲಾನ್ ಧನ್ಯವಾದ್ ಪಾಠಯ್ಲೆಂ.
----