ಆಕ್ಟೋಬರ್ 01, 2017: ರೊಜಾರ್ ಮಾಯೆಚ್ಯಾ ಫೆಸ್ತಾ ಸಂದರ್ಭಿ ಸರ್ವ್ ಫಿರ್ಗಜ್ ಕುಟ್ಮಾಚೊ ಎಕ್ತಾರ್ ಆಟಾಪ್ಚೆಂ ಭಾವ್-ಭಾಂದವ್ಪಣಾಚೊ ಆಯ್ತಾರ್ ವಾ ಕೊಂಫ್ರಿಚೊ ಆಯ್ತಾರ್ ಆಕ್ಟೋಬರ್ 1 ತಾರಿಕೆರ್ ಭೋವ್ ಸಂಭ್ರಮಾನ್ ಚಲ್ಲೊ. ಪ್ರಧಾನ್ ಯಾಜಕ್ ಬಾಪ್ ಆನಿಲ್ ಫೆರ್ನಾಂದಾನ್ ಸಂಭ್ರಮಿಕ್ ಮಿಸಾಚೆಂ ಬಲಿದಾನ್ ಭೆಟಯ್ಲೆಂ.
ಮಿಸಾ ಉಪ್ರಾಂತ್ ಎವ್ಕರಿಸ್ತಾಚೆಂ ಆರಾಧನ್ ಬಾಪ್ ಆನಿಲಾನ್ ಚಲೊವ್ನ್ ವ್ಹೆಲೆಂ. ‘ಕುಟಾಮ್-ಎವ್ಕರಿಸ್ತ್ ಜಿಯೆಂವ್ಚೆಂ ಥಳ್’ ಮ್ಹಳ್ಳ್ಯಾ ವಿಶಯಾಚೆರ್ ಆರ್ಥಾಭರಿತ್ ಪ್ರಸಂಗ್ ದಿಲೊ. ಎವ್ಕರಿಸ್ತಾ ಭೊಂವಾರಿ ಫಿರ್ಗಜ್ ಕುಟ್ಮಾಚೊ ಎಕ್ವಟ್ ಜಾಂವ್ಚ್ಯಾಕ್ ಎವ್ಕರಿಸ್ತಾಚೊ ಖರೊ ಆರ್ಥ್ ಸಮ್ಜೊನ್ ಎವ್ಕರಿಸ್ತಾಕ್ ಮಾನ್ ಆನಿ ಗೌರವ್ ಚಡಂವ್ಚ್ಯಾಕ್ ಮಾಗ್ಲೆಂ ಆನಿ ಕುಟ್ಮಾಚೆಂ ಸಮರ್ಪಣ್ ಕೆಲೆಂ. ಆಕ್ರೇಕ್ ಸಂಭ್ರಮಿಕ್ ಎವ್ಕರಿಸ್ತಾಚೊ ಪುರ್ಶಾಂವ್ ಕಾಡ್ ಸಾಕ್ರಾಮೆಂತಾಚೆಂ ಭೆಸಾಂವ್ ದಿಲೆಂ. ಸಹಭೆಟವ್ಣ್ಯೆಂತ್ ಕಾಥೆದ್ರಾಲಾಚ್ಯೆ ರೆಕ್ಟಾರ್ ಬಾಪ್ ಜೆ. ಬಿ. ಕ್ರಾಸ್ತಾ, ಬಾಪ್ ರೊಕ್ಕಿ, ಬಾಪ್ ವಿನ್ಸೆಂಟ್ ಆನಿ ಬಾಪ್ ಜಗಧೀಶ್ ಹಾಜರ್ ಆಸ್‍ಲ್ಲೆ. ಫೆಸ್ತಾಚಿ ದೇವ್‍ಸ್ತುತಿ ಲೂರ್ಡ್ಸ್ ವಾಡ್ಯಾಚ್ಯಾನಿ ಭೋವ್ ಆರ್ಥಾಭರಿತ್ ರಿತಿನ್ ಚಲವ್ನ್ ವೆಲಿ.
